Kombëtarja U20 e Kosovës në hendboll e ka shënuar edhe një fitore në IHF Trophy për zonën evropiane. Të premten mbrëma në Pallatin e Rinisë në Prishtinë, Kosova U20 fitoi ndaj Maltës me rezultatin 44:28. Cilësia ishte dukshëm në anën e hendbollistëve kosovarë që në fund shënuan fitore të thellë.
Për Kosovën U20 është fitorja e dytë pas asaj të arritur të enjten ndaj Andorrës. Po të premten, Bullgaria fitoi 46:23 ndaj Andorrës. Britania e Madhe ka fituar tri ndeshjet e deritashme dhe udhëheq në grup me gjashtë pikë. Bullgaria dhe Kosova i kanë nga katër pikë. Malta i ka dy pikë, ndërsa Andorra është pa pikë.
Të shtunën janë ndeshjet e fundit. Britania e Madhe luan ndaj Andorrës nga ora 14:00 dhe pritet ta sigurojë titullin e kampionit. Ndërkohë Bullgaria dhe Kosova luajnë prej orës 18:00.
