Search
Close this search box.
Search
Close this search box.

Kastrioti fiton ndeshjen shumë dramatike me Trepçën

Kastrioti ka nisur ngadalë, por ka festuar në fund të ndeshjes hapëse të edicionit 2023/2024 në Superligën e Kosovës në hendboll (meshkujt). Të shtunën mbrëma në palestrën “Bill Clinton” në Ferizaj, Kastrioti e mposhti Trepçën e Mitrovicës me rezultat 31:30. Ndeshja ishte skajshmërisht dramatike dhe u vendos në aksionet e fundit.
Portieri Dardan Dugolli ka shkëlqyer te Kastrioti dhe ka udhëhequr skuadrën ferizajase drejt fitores së madhe. Festim Mustafa ishte më efikasi me 11 gola. Shtatë i kishte Beni Syla e gjashtë Vlerson Zherka. Te Trepça më efikasi ishte Deniz Terziqi me dhjetë gola. Lulzim Shabani i kishte gjashtë e Yassine Henahem pesë.
Trepça nisi fuqishëm dhe shpejtë krijoi epërsi prej 7:1. Në pjesën e parë mitrovicasit vazhdimisht kanë mbajtur epërsi prej 4-5 golash. Por kjo nuk ishte e mjaftueshme. Vendasit nuk u dorëzuan.
Kastrioti për herë të parë ka barazuar në minutën e 37-të, 18:18. Në minutën e 48-të kaloi në epërsi 24:23. Më pas u zhvillua ndeshje shumë interesante, kurse Kastrioti në fund kishte edhe dy gola avantazh, 30:28. Prapë mitrovicasit barazuan në 30:30, ndërsa Syla shënoi golin e 31-të për Kastriotin në minutën e 59-të. Në sulm Trepça bëri faul dhe kështu fitorja dhe festa u takoi ferizajasve.
Ishte kjo një hapje shumë e mirë e kampionatit, që pritet të ketë shumë ndeshje të forta e dramatike.

Lajme tjera