Kombëtarja U19 e Kosovës në hendboll më 1 korrik do t’i nis përgatitjet për Kampionatin Evropian (Divizioni B), që prej 10 deri më 18 korrik mbahet në Shkup.
Në Kombëtaren U19 ka shumë emra të rinj. Për herë të parë do të grumbullohet edhe portierja Venera Kafexholli, që karrierë bën në Zvicër. Prej saj, por edhe prej të gjitha lojtareve tjera pritet shumë nga Evropiani në Shkup.
Për faqen zyrtare të FHK-së, Kafexholli ka folur në prag të grumbullimit të parë me Kosovën. Ajo është krenare që do ta ketë rastin ta ruaj portën e Kosovës.
“Jam shumë e lumtur dhe krenare që do të luaj për vendlindjen e prindërve të mi. Si familje jemi shumë të lidhur me Kosovën, vendin tonë. Gjithnjë i kalojmë pushimet në atdhe dhe jam shumë e kënaqur që e kam mundësinë të kontribuoj për Kosovën. Do të mundohem që ta jap gjithnjë maksimumin. Ndoshta nuk kam lindur në Kosovë, por kam shumë krenari dhe dashuri për të. Jam shumë krenare me prejardhjen time”, thotë Venera Kafexholli.
19-vjeçarja është përcjellur për një kohë nga përgjegjësit e FHK-së, njëjtë si gjitha lojtaret tjera që janë në listën e zgjeruar. Venera ka marrë përkrahjen e plotë të familjes që të luaj për Kosovën. Ajo ka mbështetje të plotë nga babai për karrierën në hendboll.
“Si sportiste gjithmonë kam ëndërruar të luaj për Kosovën. Ka qenë synim i madh për mua. Por nuk mund të them se e kam pritur ftesën. Ka qenë një befasi e mirë për mua dhe për familjen time”, ka theksuar Venera.
Ajo e premton maksimumin dhe është e vendosur të mos e zhgënjej askënd me paraqitje. Mezi pret të bashkohet me vajzat dhe është e bindur se rezultatet në Shkup do të jenë të mira.
Venera ka nisur me hendboll në vitin 2011 te skuadra Ruswil/Wolhusen. Nisi si pivote, por prej vitit 2015 zuri vend në portë, ku është paraqitur shumë mirë. Në vitin 2016 ishte në një përzgjedhje rajonale, ndërsa në vitin 2017 kaloi te Spono Eagles. Me Sponon ka luajtur në ekipet U16 e U18. Është paraqitur edhe në kategorinë e dytë zvicerane. Në vitin 2020 mori ofertë nga BSV Stans, ku vazhdon të luaj, në SPL2. Ka fituar titullin e kampionit dhe Kupën e Zvicrës për grupmosha të reja.
Venera Kafexholli jeton në Ruswil të Zvicrës, ndërsa familja e saj është nga Bellanica e Malishevës. Ka lindur në Zvicër dhe po e vazhdon shkollimin për arsimtare, me fokus te Edukata Fizike.
Ka shpresë se disa prej lojtareve të Kombëtares U19 do të tregojnë nivel të lartë dhe do të jenë kandidate për Kombëtaren A. Venera është njëra prej atyre prej të cilave pritet shumë.
