Shumë interesante ishte ndeshja e parë në Final 4 të Kupës së Kosovës në hendboll.
Në gjysmëfinalen e parë në konkurrencë të femrave, Istogu fitoi 31:30 ndaj Vushtrrisë.
Ndeshja ishte e fortë, interesante dhe u vendos vetëm në aksionin e fundit. Vushtrriaset e kishin aksionin e fundit e më pas edhe gjuajtjen e fundit, por pa realizuar gol. Dhe kështu fitorja me një gol dallim u takoi istogaseve që të dielën nga ora 17:30 paraqiten në finale.
Astou Ndiaye i shënoi plot dhjetë gola për Istogun. Shtatë i kishte Paulo Sebastiao Suca, ndërsa nga katër i shënuan Suzana Ujkiq e Nihed Limem.
Te Vushtrria 12 gola i shënoi Sevdanur Ozkan. Burneta Rama e Gentiana Basholli i shënuan nga pesë, ndërsa katër i kishte Fetane Uzunlar. U shqua edhe portierja Arjeta Maloku.
Turneu final i Kupës po zhvillohet në Ferizaj.
