Istogu është kualifikuar në finale të Kupës së Republikës së Kosovës në hendboll për femra. Në finale Istogu pritet të takohet me Kastriotin e Ferizajt. Në ndeshjet gjysmëfinale që u luajtën të premten në palestrën “Karagaçi” në Pejë, Kastrioti e mposhti Shqiponjën, ndërsa Istogu fitoi ndaj Vushtrrisë.
Të dy ndeshjet gjysmëfinale ishin të forta dhe përfunduan me nga vetëm një gol dallim.
Gjysmëfinalja e parë ishte ajo mes Shqiponjës së Gjakovës dhe Kastriotit. Derisa Shqiponja është në garë për titull në Superligën A, Kastrioti bënë gara në Superligën B. Por gjysmëfinalen e Kupës e fitoi Kastrioti me rezultat 29:28. Pas pjesës së parë rezultati ishte i barabartë, 18:18. A. Dinarica me tetë gola ishte më efikasja te Kastrioti. Ndërsa Sh. Fazlija shënoi 13 herë për Shqiponjën. Por kjo ndeshje nuk pati rrjedhë krejt normale. Në minutën e 60-të ndeshja u ndërpre për plot 23 minuta, pas pakënaqësive që kishte skuadra e Shqiponjës me referim. Për këtë ndeshje Shqiponja ka paraqitur ankesë, që pritet të shqyrtohet nesër. Vetëm pasi të shqyrtohet ankesa nga organi përkatës, ndeshja do të regjistrohet.
Në gjysmëfinalen e dytë u takuan dy skuadrat që luftojnë edhe për titull, Vushtrria që është lider dhe Istogu që mban pozitën e tretë. Rezultati në fund ishte 20:19 në të mirë të Istogut. Pas pjesës së parë istogaset kishin tri gola epërsi (13:10). E. Kameri me dhjetë gola ishte më efikasja te Istogu. Sh. Tahiri shënoi pesë herë për Vushtrrinë.
Finalja e Kupës në konkurrencë të femrave luhet të dielën nga ora 17:00 në palestrën “Karagaçi” në Pejë.
Shqiponja – Kastrioti 28:29 (18:18)
Shqiponja: Haxhosaj, Rudaku, Juniku 3, Nivokazi 1, Berisha 1, Fazlija 13, Mehmeti 3, Goqi 1, Malaj 5, E. Goqi, Dobruna 1, L. Ferizi, E. Ferizi, Nuza, Bajrami, Gashi.
Kastrioti: Saliu, Stagova, S. Reqica, Muhaxheri 3, Misini, E. Reqica 1, Salihu 5, Qerkini 4, Gashi 5, A. Dinarica 8, Gashi 3, M. Dinarica, Gurgurovci, Rugova.
Istogu – Vushtrria 20:19 (13:10)
Istogu: Abdylaj, Ujkiq, Kameri 10, Bakiq, Zogaj, Shatri, Rrahmani 1, Rugova 3, Shehdadi, Fejzaj, F. Rexhaj 2, Halitaj, V. Rexhaj, Krasniqi 4, Berisha.
Vushtrria: Kelmendi, Gubetini, Salihu, Shala 4, Avdiu 3, Zymberi 3, Preniqi 1, Mehmeti, Sfarqa, Paci 1, R. Gubetini, Murati, Kasumi 2, Tahiri 5, Rrahmani.
