Qerimi shpall listën e hendbollistëve që synojnë ta shkruajnë historinë

Selektori i Kosovës në hendboll, Bujar Qerimi, të premten ka shpallur listën e lojtarëve të ftuar për ndeshjet me Malin e Zi dhe Suedinë. Janë këto duelet e fundit të fazës së dytë kualifikuese për “Euro 2022”.

Pas barazimit dhe fitores së jashtëzakonshme ndaj Rumanisë, Kosova synon fitoren me Malin e Zi për të siguruar suksesin historik – kualifikimin në Kampionatin Evropian.

Ndeshja Kosovë – Mali i Zi zhvillohet më 28 prill në Prishtinë. Më pas më 2 maj, Kosova i mbyll eliminatoret me ndeshjen në udhëtim ndaj Suedisë, nënkampiones në fuqi të botës.

Kosova është e treta në Grupin 8 me 3 pikë, sa i ka edhe Rumania në vend të dytë. Suedia udhëheq me 6 pikë, kurse Mali i Zi është i katërti me 2 pikë. Kosova e Rumania i kanë luajtur nga katër ndeshje, ndërsa Suedia e Mali i Zi nga tri.

Seleksionuesi Qerimi është bazuar në ekipin që ka siguruar fitoren historike në Bukuresht. Por ka edhe emra të rinj.

Në ekipin kombëtar janë kthyer Fatlum Ahmeti e Bashkim Gashi që bëjnë karrierë në Suedi. Për herë të parë në Kombëtare janë ftuar Agon Bajqinovci i Prishtinës dhe Arbios Mushkolaj e Arti Luzha të Besa Famgas.

Në ekipin e zgjeruar të Qerimit bëjnë pjesë 20 lojtarë. Ndërkohë në shtabin teknik të tij janë Fatmir Muhaxheri e Veton Hajrizi.

Grumbullimi i hendbollistëve bëhet më 23 prill në Hotelin Internacional në Prishtinë prej orës 12:00.

Lista e lojtarëve

No	Name	Club	Position	Matches	Goals
2	Agon Bajqinovci	KH Prishtina	RW	0	0
5	Kastriot Jupa	KH Besa Famgas	PV	42	153
8	Bashkim Gashi	Örebro SK (SWE)	LW	6	6
11	Valon Dedaj	HSC Kreuzlingen (SUI)	CB	32	117
13	Fatlum Ahmeti	LIF Lindesberg (SWE)	PV	14	21
14	Drenit Tahirukaj	HSC Kreuzlingen (SUI)	RB	16	29
15	Deniz Terziqi	KH Prishtina	LB	34	102
18	Arti Luzha	KH Besa Famgas	GK	0	0
21	Arbios Mushkolaj	KH Besa Famgas	RW	0	0
24	Luigj Quni	GC Amicitia Zürich (SUI)	PV	25	31
25	Festim Mustafa	KH Kastrioti	LB	0	0
26	Drilon Tahirukaj	KH Besa Famgas	RW	28	53
27	Lulëzim Shabani	KH Prishtina	LW	4	0
28	Haris Berisha	HSC Kreuzlingen (SUI)	GK	24	1
31	Bujar Ramosaj	KH Besa Famgas	LB	13	3
33	Jon Muqolli	KH Besa Famgas	LB	7	1
34	Leonard Gegaj	Kärra HF (SWE)	CB	7	3
35	Rron Ramadani	KH Prishtina	PV	5	0
68	Egzon Gjuka	KH Besa Famgas	CB	23	51
91	Liridon Zena	RK Zamet (CRO)	GK	6	0