Samadrexha e ka fituar me vetëm një gol dallim derbin lokal me Vushtrrinë.
Të martën mbrëma në palestrën “Jeton Tërstena – Tota” në Vushtrri, Samadrexha fitoi me rezultat 25:24. Kjo ndeshje ishte e vlefshme për xhiron e 16-të të Superligës së Kosovës në hendboll.
Samadrexhaset shpejt krijuan epërsi prej 3-4 golash, që e mbajtën deri në fund të pjesës së parë.
Në minutën e 49-të rezultati u barazua në 18:18. Më pas Samadrexha regjistroi seri 4:0 për t’u shkëputuar 22:18. Dhe kjo doli të jetë vendimtare. Skuadra mysafire ia doli ta mbajë epërsinë deri në fund të ndeshjes.
Tina Hetemi, Bojana Radeska dhe Jennifer Toledo Abreu i shënuan nga pesë gola për Samadrexhën. Nga katër i kishin Arlinda Maloku e Mirjeta Dinolli.
Burneta Rama i shënoi tetë gola për Vushtrrinë. Pesë i kishte Sevdanur Ozkan e katër Agnesa Hysa.
Samadrexha tani i ka 20 pikë në vendin e tretë. Vushtrria mbetet e gjashta me 12 pikë.
