Besa Famgas e Rahoveci kanë ofruar spektakël hendbolli të dielën mbrëma në palestrën “Karagaçi” në Pejë. Në kuadër të xhiros së 11-të të Superligës së Kosovës në hendboll është luajtur superderbi mes dy skuadrave aktualisht kryesore në vendin tonë.
Ndeshja ishte shumë e fortë dhe shumë interesante nga fillimi e deri në fund. Të dy skuadrat kanë luajtur mbrojtje të fortë, ndërsa formë të lartë kanë shfaqur portierët, Arbër Curri e Arti Luzha te Rahoveci dhe Mursel Mehmeti te Besa Famgas.
Ndeshjen dramatike e fitoi Rahoveci me rezultat 29:27. Rahoveci për herë të dytë këtë edicion e ka mposhtur skuadrën pejane. Rahoveci tani është shkëputur në tabelë me 22 pikë. Ka vetëm fitore.
Besa mbetet e dyta me 16 pikë, por ka një ndeshje më pak të luajtur.
Në pjesën e parë Besa Famgas krijoi epërsi deri në katër gola, 9:5. Por më pas “vreshtarët” u kthyen dhe deri në fund të pjesës së parë u zhvillua lojë e barabartë. Deri në minutën e 50-të sërish vendasit ishin kryesisht para me një e dy gola.
Në minutën e 51-të, Rahoveci kaloi para me dy gola, 24:22. Besa Famgas barazoi në 24:24 e më pas kaloi në epërsi 25:24. Në minutën e 56-të për epërsinë 26:25 të Rahovecit shënoi pivoti Jeton Bislimi. Besa sërish barazoi në 26:26, ndërsa për 27:26 në të mirë të Rahovecit shënoi Mali Luzha. Curri më pas bëri pritje vendimtare, kurse Bislimi shënoi për 28:26 në minutën e 58-të.
Igor Chesliov shënoi golin e 27-të për Besën në minutën e 59-të, ndërsa në fund penallti për 29:27 shënoi Victor Alonso.
Alonso e Jon Muqolli ishin më efikasët te Rahoveci me nga gjashtë gola. Te Besa, Ajdin Smajlbegoviq i shënoi shtatë gola, ndërsa gjashtë i kishte Arbios Mushkolaj.
Ndeshja ishte thuajse e barabartë gjatë tërë kohës dhe të dy skuadrat kanë dëshmuar se do të zhvillojnë garë të fortë deri në fund të edicionit.
Të dielën u luajt edhe ndeshja Vushtrria – Kastrioti. Fitore shënoi skuadra ferizajase me rezultat 38:31.
Te hendbollistet u luajt ndeshja Vëllaznimi – Prishtina. Skuadra prishtinase fitoi 41:27.
Menu
