Superndeshje kanë zhvilluar Kastrioti e Besa Famgas të shtunën mbrëma në palestrën “Bill Clinton” në Ferizaj, në një atmosferë të bukur sportive.
Kastrioti e fitoi derbin e xhiros me rezultat 40:37.
Ndeshja ishte e barabartë dhe me fund dramatik. Hendbollistët ferizajas kanë shfrytëzuar përvojën për ta mbyllur ndeshjen në të mirë të tyre. Ndërkohë ekipit pejan i kushtuan rastet ideale që i lëshuan, sidomos në fund.
Portieri Wadi Chebbi bëri një pritje të rëndësishme në minutën e fundit, ndërsa u shqua edhe me disa ndërhyrje tjera në pjesën e dytë.
Më efikasi te Kastrioti ishte Yassine Henahen me plot 13 gola. Tetë i realizoi Deniz Terziqi e shtatë Festim Mustafa.
Olsi Mulaj i shënoi nëntë gola për Besa Famgas. Vladimir Stankoviq, pos që orkestroi lojën e rrjedhshme të Besës, i realizoi edhe tetë gola. Gjashtë i kishte Jon Vokshi.
Në pjesën e parë vendasit ishin kryesisht në epërsi të lehtë.
Kastrioti kishte një shkëputje 5:2 në fillim e më pas arriti epërsi prej tri golash edhe në dy raste. Por minutat e fundit të pjesës së parë ishin të barabartë, ndërsa rezultati pas 30 minutash ishte 20:20.
Në pjesën e dytë Besa fillimisht bëri shkëputje prej dy golash, 22:20, 23:21. Më pas është luajtur për secilin gol, ndërsa Kastrioti në fund krijoi epërsi prej tri golash, 39:36 e në fund edhe 40:37.
Ishte kjo një shfaqje e bukur hendbolli që dëshmon se gara për trofe do të bëhet interesante.
Pas xhiros së 24-t, Kastrioti është i dyti me 38 pikë, ndërsa Besa Famgas bie në vendin e tretë me 36 pikë.
