Trepça e ka fituar ndeshjen e fundit të xhiros së 24-t të Superligës së Kosovës në hendboll.
Të mërkurën mbrëma në “Minatori”, Trepça e mposhti Llapin me rezultat 34:29. Ndeshja ishte me rivalitet dhe me duele të forta. Vendasit ishin shumicën e kohës në epërsi, por llapjanët nuk janë dorëzuar.
Ndeshja nisi me seri 5:0 të Trepçës, por Llapi u kthye dhe barazoi 6:6. Më pas Llapi kishte epërsi prej një goli në disa raste, kurse pas pjesës së parë rezultati ishte 17:15 për vendasit. Në minutën e 45-të mysafirët barazuan në 22:22. Më pas “xehetarët” u shkëputën deri në gjashtë gola për fitore të rëndësishme në fund.
Ermir Smaka i shënoi shtatë gola për Trepçën, ndërsa nga gjashtë i shënuan Sali Maxhera, Amar Mujka e Arbër Neziri.
Te Llapi gjashtë gola i shënoi Rifat Visoka, derisa nga pesë i shënuan Blerton Hasani e Endrit Havolli. Katër i kishte Etnik Bajoku.
Me fitore Trepça e kaloi Llapin në tabelë. Trepça tani është e gjashta me 12 pikë, ndërsa Llapi mban vendin e shtatë me 11 pikë.
