Njomza Kelmendi ka bërë pritje vendimtare në sekondën e fundit për ta ndihmuar Vushtrrinë që ta fitoj titullin e kampionit në Superligën e Kosovës në hendboll. Vushtrria të shtunën mbrëma fitoi 22:21 ndaj Istogut në ndeshjen e tretë të finales së plejofit. Golin e fitores e shënoi Donita Kasumi.
Ndeshja është luajtur në Istog, ndërsa Vushtrria me rezultat 2:1 në finale të plejofit shpallet kampione.
Portierja Kelmendi, që ka bërë mbi dhjetë pritje, ndali gjuajtje në fund për të pamundësuar barazimin.
Ndeshja ishte shumë e fortë e shumë dramatike. Vushtrriaset në fund kanë realizuar sulme rresht, sidomos nga alot, për të shkrirë epërsinë e vendaseve. Në pjesën e dytë epërsia e Istogut shkoi deri në 4 gola, 21:17. Por më pas vushtrriaset shënuan pesë gola rresht për ta fituar titullin. Luljeta Sopjani barazoi rezultatin në 21:21 në minutën e 59-të, kurse golin e fitores e shënoi Donita Kasumi në minutën e fundit.
Esma Muratoviq shënoi 9 gola për Istogun, por që nuk mjaftuan. Te Vushtrria 6 gola i kishte Donita Kasumi, kurse nga 5 i kishin Luljeta Sopjani e Lorena Matarova.
Por kontribut të madh për titull kanë dhënë të gjitha lojtaret duke nisur nga kapitenia Shqipe Tahiri, portierja Kelmendi, Burneta Rama, Kasumi, Sopjani, Matarova, Zade Zymeri e gjithë të tjerat. Natyrisht merita të mëdha ka trajneri Arben Parduzi.
Kupen kapitenes Shqipe Tahiri ia dorëzoi nënpresidenti i FHK-së, Enis Idrizi.
