Publikohet lista e gjerë e Kombëtares u18

Kryetrajneri i Kombëtares U18 të Kosovës në hendboll, Taib Kabashi, ka publikuar listën e gjerë të lojtarëve në të cilët llogarit për turneun në Bullgari e më pas edhe për Kampionatin Evropian të Divizionit B.

Në listën e Kombëtares U18 janë 35 hendbollistë. Shumica janë të klubeve të vendit, që do të testohen të hënën. Stërvitja testuese do të mbahet nga ora 16:00 në Pallatin e Rinisë dhe Sportit në Prishtinë. Hendbollistet që janë në listën e gjerë duhet të jenë në palestër në ora 15:30, ndërsa me vete duhet të kenë pajisjet sportive si dhe t’iu përmbahen masave në luftë ndaj COVID-19. Në listë janë tre hendbollistë që po e mësojnë lojën e hendbollit në vende evropiane.

Kjo gjeneratë grumbullohet për herë të parë së bashku, ndërsa turneu në Bullgari do të jetë shumë i rëndësishëm. Turneu mbahet prej 12 deri më 15 nëntor kurse pos Kosovës e Bullgarisë marrin pjesë edhe Turqia e Moldavia.

Lojtarët e përzgjedhur të hënën, do të grumbullohen sërish para udhëtimit për në Bullgari.

Shtabin teknik të Kombëtares U18 e përbëjnë edhe trajnerët Edmond Vokshi e Alban Haziri, që kanë punuar me këtë gjeneratë në kampin e vitit të kaluar.

Evropiani i Divizionit B mbahet në janar.