Ashtu si pritej, xhiroja e 14-të e Superligë së Kosovës në hendboll ka dhënë rezultate dhe ndeshje shumë interesante. Ndeshjet e xhiros së 14-të, të fundit për stinorin vjeshtor, u luajtën të mërkurën mbrëma.
Befasinë e madhe e ka shkaktuar Deçani që e ka mposhtur Prishtinën me rezultat 29:27.
Deçanasit nisën herët shkëputjen, ndërsa epërsia në pjesën e parë në disa raste ishte pesë gola.
Në pjesën e dytë Prishtina u afrua disa herë në një gol, por pa mundur të barazoi rezultatin. Në fund rezultati ishte 29:27.
Fatlind Mazrekaj i ka shënuar 19 gola për Deçanin. 4 i shënoi Ilir Thaqi.
Te Prishtina, Sergio Barreto i shënoi shtatë gola. Gjashtë i kishte Hamdi Salihu.
Dramatike ishte edhe ndeshja mes Vëllaznimit dhe Kastriotit, dy skuadrave me traditë. Dhe ajo nuk dha fitues, përfundoi 30:30. Arbër Neziri i shënoi nëntë gola për Vëllaznimin, kurse tetë i kishte Ardi Halili. Granit Fana e Florian Rexha i shënuan nga pesë gola.
Te Kastrioti, Festim Mustafa i shënoi tetë gola, ndërsa gjashtë i kishte Drilon Bega.
Fitore të madhe ka shënuar Rahoveci, që e mposhti Trepçën në Mitrovicë me rezultat 31:29. Ndeshja ishte e fortë dhe interesante deri në fund. Por vreshtarët shfaqën më shumë dhe morën dy pikë të vlefshme.
Mali Luzha shënoi 8 gola për Rahovecin, ndërsa nga 6 i kishin Alban Haziri e Marley De Carvalho Fernandes.
Yassine Henahen i shënoi 10 gola për mitrovicasit.
Vushtrria pa telashe fitoi ndaj Llapit, me rezultatin 46:27.
Menu
