Portieri Meriton Lladrovci ka shfaqur formë të lartë të shtunën mbrëma në palestrën “Mizahir Isma” në Rahovec. Dhe ishte më meritori për fitoren e Trepçës në ndeshjen e fortë dhe shumë dramatike ndaj Rahovecit.
Trepça fitoi me një gol dallim, 25:24.
Ndeshja Rahoveci – Trepça i ka takuar javës së pestë të Superligës së hendbollisteve. Mysafirët kanë hapur ndeshjen më mirë dhe kanë krijuar epërsi solide. Por vendasit, ndonëse thuajse gjatë tërë kohës në disavantazh, nuk janë dorëzuar për asnjë moment. E barazuan rezultatin në 21:21, por më pas dështuan në disa aksione. Sërish Trepça krijoi epërsi prej tri golave, por Rahoveci u afrua në një gol dhe madje kishte mundësitë për të barazuar rezultatin në 25:25. Por Lladrovci ndali edhe gjuajtjen e fundit të “vreshtarëve” dhe kështu ndeshja me fund dramatike përfundoi me fitoren e Trepçës. Portieri i skuadrës mitrovicase i kishte 20 pritje.
Edhe skuadra vendase ka shfaqur lojë të mirë, ndërsa në momente i ka munguar edhe fati.
E fortë ishte edhe ndeshja në mes të Kastriotit dhe Vëllaznimit. Fitore shënoi skuadra ferizajase me rezultat 26:23. Në pjesën e parë Kastrioti kishte epërsi të lehtë, ndërsa gjakovarët ia dolën të barazojnë disa herë. Në pjesën e dytë Kastrioti krijoi epërsi më bindëse (20:14), por Vëllaznimi u afrua në dy gola (21:19, 22:20, 24:22, 25:23). Në fund rezultati ishte 26:23. Lulzim Shabani i kishte 10 gola kurse Shpëtim Mehmeti i realizoi 6 te Kastrioti. Te Vëllaznimi u dallua Florian Rexha me 7 gola. 6 i kishte Ardi Halili.
Prishtina ka fituar bindshëm ndaj Deçanit në kryeqytet. 41:24 ishte rezultati në fund.
Bindëse ishte edhe Vushtrria ndaj Llapit. Ndeshja në Podujevë përfundoi me rezultat 42:27 në të mirë të Vushtrrisë.
