Trajneri i Vushtrrisë, Arben Parduzi nuk është befasuar me shortin për Kupën Evropiane. Shorti ka bërë që fituesja e Kupës, Vushtrria, të përballet me Istogun, finalistin e plejofit.
Ndeshja e parë do të luhet në Vushtrri kurse e kthimit në Istog. Dy ndeshjet janë në muajin tetor.
“Duke pasur parasysh rrethanat e krijuara nga COVID-19 në gjithë botën, kemi pritur të përballemi me ekipet e rajonit, por nuk e kemi përjashtuar mundësinë që të përballemi me ekipin e Istogut pasi ishim në zonë të njëjtë e vazo të ndryshme. Fati deshi që të takohemi mes vete.
Synimet e Vushtrrisë gjithmonë janë për rezultate pozitive, andaj ne do të përgatitemi sa më mirë për këto përballje jo të lehta në këtë kohë të cilën po e kalojmë, me kushte të kufizuara në lëvizje e po ashtu me palestra të mbyllura. Por shpresojmë të na mundësojnë që ekipet që jemi në gara ndërkombëtare të zhvillojmë stërvitje në palestra.
Është hera e parë që dy ekipe kosovare takohen mes vete në gara ndërkombëtare, andaj do të jenë dy lojë interesante dhe të forta.
Do të shohim mundësitë që kemi që të përforcohemi për këto dy ndeshje, në pozitat ku kemi nevojë më shumë”, ka thënë Parduzi.
